Жүктерді тасымалдайтын көліктердің түрі көп. Олардың пішіні мен көлемі де әр басқа. Солардың бірі — жолда өзіміз көп кездестіретін ауыр жүк көлігі. Ол әдетте ауыр жүктерді алысқа жеткізеді. Ауыл мен қала ішінде де жүктерді тасымалдай береді.
«Көңілді көліктер» топтамасындағы «Ауыр жүк көлігі» әңгімесі жас оқырмандарды осы көліктің атқаратын қызметімен таныстырады. Шындығында, ауыр жүк көлігімен күні бойы бірге болып, оның атқаратын істерімен танысу — балалар үшін қызық. Түрлі-түсті суреттермен безендірілген бұл кітап кішкентай бүлдіршіндерге арналғандықтан, түсінікті әрі қарапайым тілмен берілген. Ауыр жүк көлігінің қызметін сипаттайтын бұл кітапты кішкентай оқырмандарымыз ата-аналарымен бірге қызыға оқитынына сенеміз.